​ദോഹ: പശ്ചിമേഷ്യയിൽ ഭൗമരാഷ്ട്രീയ സംഘർഷങ്ങൾ (Geopolitical tensions) കടുക്കുന്ന സാഹചര്യത്തിൽ, ആഗോള സാമ്പത്തിക ഭദ്രത ഉറപ്പാക്കാൻ 'ഊർജ്ജ സുരക്ഷ'യ്ക്ക് മുൻഗണന നൽകണമെന്ന് വിദഗ്ദ്ധർ. പരമ്പരാഗത ഉൽപാദന രീതികളിൽ നിന്ന് മാറി, തടസ്സങ്ങളെ അതിജീവിക്കാൻ ശേഷിയുള്ള ബഹുമുഖ വിതരണ ശൃംഖലകൾ (Multi-path systems) വികസിപ്പിക്കുകയാണ് ഭാവിയിലെ പ്രധാന വെല്ലുവിളിയെന്ന് ഖത്തർ ന്യൂസ് ഏജൻസിക്ക് (QNA) നൽകിയ അഭിമുഖത്തിൽ പ്രമുഖ ഊർജ്ജ വിദഗ്ദ്ധർ ചൂണ്ടിക്കാട്ടി.ആഗോള ഊർജ്ജ വിപണിയിലെ കേവലം ഒരു ഉൽപാദകൻ എന്നതിലുപരി, പ്രതിസന്ധി ഘട്ടങ്ങളിൽ വിശ്വസിക്കാവുന്ന പങ്കാളി എന്ന നിലയിൽ ഖത്തറിന്റെ സ്ഥാനം അതീവ നിർണ്ണായകമാണെന്ന് ഓയിൽ ആൻഡ് ഗ്യാസ് വിദഗ്ദ്ധൻ എഞ്ചി. നാസർ ജഹാം അൽ കുവാരി പറഞ്ഞു.നിലവിൽ പ്രതിവർഷം 77 ദശലക്ഷം ടൺ എൽ.എൻ.ജി (LNG) ഉൽപാദിപ്പിക്കുന്ന ഖത്തർ, വരും വർഷങ്ങളിൽ ഇത് 142 ദശലക്ഷം ടണ്ണായി ഉയർത്താൻ ലക്ഷ്യമിടുന്നു.ഏഷ്യയിലെയും യൂറോപ്പിലെയും വൻകിട സമ്പദ്‌വ്യവസ്ഥകൾ ഖത്തറിനെ മുൻഗണനാ പങ്കാളിയായി കാണുന്നത് ദീർഘകാല കരാറുകൾ പാലിക്കുന്നതിലെ ഖത്തറിന്റെ കൃത്യനിഷ്ഠയാണ്.ഹോർമുസ് കടലിടുക്കിനെ ഒഴിവാക്കി അറബിക്കടലിലേക്കും ചെങ്കടലിലേക്കും ഇന്ധനം എത്തിക്കാൻ പൈപ്പ് ലൈൻ ശൃംഖലകൾ വിപുലീകരിക്കണമെന്ന് 
ഹോർമുസ് കടലിടുക്ക് പോലുള്ള തന്ത്രപ്രധാനമായ പാതകളെ മാത്രം ആശ്രയിക്കുന്നത് നിലവിലെ സാഹചര്യത്തിൽ അപകടസാധ്യത വർദ്ധിപ്പിക്കുന്നതിനാൽ ഇതിന് പരിഹാരമായി വിദഗ്ദ്ധർഅഭിപ്രായപെട്ടു.ഉപഭോക്തൃ രാജ്യങ്ങൾക്ക് സമീപം (ഏഷ്യയിലും യൂറോപ്പിലും) ഇന്ധന ശേഖരം (External Storage) ഉറപ്പാക്കുന്നത് വിതരണ തടസ്സങ്ങൾ നേരിടാൻ സഹായിക്കുമെന്നും സൈബർ ആക്രമണങ്ങളെ പ്രതിരോധിക്കാനും അടിസ്ഥാന സൗകര്യങ്ങൾ സംരക്ഷിക്കാനും ആർട്ടിഫിഷ്യൽ ഇന്റലിജൻസ് (AI), അത്യാധുനിക എയർ ഡിഫൻസ് സംവിധാനങ്ങൾ എന്നിവ സംയോജിപ്പിക്കണമെന്നും നിർദ്ദേശിച്ചു.ജി.സി.സി (GCC) രാജ്യങ്ങൾക്കിടയിൽ വൈദ്യുതി വിനിമയ ശൃംഖലകൾ ശക്തിപ്പെടുത്തുന്നതും അടിയന്തര സാഹചര്യങ്ങളിൽ ഊർജ്ജം പങ്കുവെക്കുന്നതും ഗുണകരമാകും.ഭാവിയിലെ ഊർജ്ജ സുരക്ഷ എന്നത് വെറും ഉൽപാദനം മാത്രമല്ല, മറിച്ച് ഏത് പ്രതിസന്ധിയിലും തടസ്സമില്ലാതെ ഊർജ്ജം വിപണിയിൽ എത്തിക്കാനുള്ള കഴിവാണെന്ന് പ്രൊഫ. ഒമർ ഖ്ലൈഫ് ഖറൈബെ ഊന്നിപ്പറഞ്ഞു. പരമ്പരാഗത കരുത്തും ആധുനിക സാങ്കേതിക വിദ്യയും സമന്വയിപ്പിച്ചുകൊണ്ട് ഒരു ആഗോള 'ഊർജ്ജ ഹബ്ബ്' ആയി മാറാൻ ഖത്തറിന് സാധിക്കുമെന്നും വിദഗ്ദ്ധർ പ്രത്യാശ പ്രകടിപ്പിച്ചു.